نصائح ومعلومات للقيادة فى الشبورة

دي شوية نصايح ومعلومات عن الشبورة وازاي تسوق فيها ان اضريت لكده وربنا يستر علينا جميعا .

ياريت يا جماعه نركز في الكلمتين دول عشان دي حياتك وحياة غيرك فمعلش نتعب شويه ونقرأ للآخر
أول نصيحة هاقولهالك انك لو لقيت شبوره وانت في بيتك بلاش تتحرك وأجل معاد لغاية ما تروح الشبوره وافتكر ان الاستعجال بسببه ممكن تتسبب في خسارة حياتك او ممتلكاتك او حياة وممتلكات غيرك ، طيب لو انت على طريق ونزلت عليك الشبورة فجأه ؟ والله لو قدرت تركن ياريت لحد ما تزول الشبوره لكن لو ماقدرتش يبقى تعمل كالآتي :

نصائح ومعلومات للقيادة فى الشبورة

نصائح ومعلومات للقيادة فى الشبورة
– [ ] لو عربيتك حديثه شويه هتلاقي فيها لمبة فوج في الفانوس الخلفي بيكون ليها زرار مخصوص في دراع النور ودي لمبه بتنور أحمر جامد عشان تخترق الضباب وتبين عربيتك للي جاي وراك ياريت تشغلها وبلاش اشارات الإنتظار بتاعتك تشتغل اثناء السير وافتكر ان الهدف انك تبين عربيتك للي جاي وراك عشان مايخبطش فيك لإن الرؤيا تكاد تكون منعدمه .

نصائح ومعلومات للقيادة فى الشبورة
– [ ] شغل نور الفوج في السياره والنور الواطي ولو عندك زرار تحكم النور خلي النور الواطي مكفي على الأرض عشان ينور الأرض وافتكر انك في الوقت ده محتاج تشوف كام متر بس قدامك مش محتاج مسافات بعيده اوي .

– [ ] تجنب استخدام النور العالي في الضباب خليك في الواطي والفوج لايت بس عشان النور العالي بيعكس قطرات الماء في الجو وبالتالي هتلاقي صعوبه في الرؤيه.

– [ ] سيب مسافه كافيه بينك وبين اللي قدامك بلاش تلزق فيه .

نصائح ومعلومات للقيادة فى الشبورة
– [ ] الشبوره بتسبب حاله اسمها الإلهاء البصري optical illusion ودي بتخليك تتخيل ان ماشي براحه جدا وانت في الحقيقه ماشي بسرعه معقوله ، الإلهاء البصري ده بيخليك تزود سرعتك عن الطبيعي فتحصل الكارثه عشان كده ماتعتمدش في الشبوره على نظرك وتقييمك الذهني لسرعة السياره واستخدم عداد السرعه لمعرفة سرعتك الفعليه .

– [ ] لو قدرت تركن على جنب ده احسنلك وصدقني كام ساعه تضيع احسن مايحصل مكروه بعد الشر .

– [ ] امشي براحه وافتكر انك محتاج تركيز كامل في الرؤيه بس انت عايز تشوف قدامك بس مش عايز تنجز .

– [ ] ماينفعش تشغل مثبت السرعه وانت سايق انت محتاج رد فعل سريع وتركيز أعلى.

– [ ] لما تيجي تفرمل فرمل براحه عشان تدي للي وراك فرصه انك يفرمل هو كمان وطبعا الكلام ده في قدر المتاح والموقف .

نصائح ومعلومات للقيادة فى الشبورة
– [ ] لو لقيت الدنيا قفلت خالص وهاتركن يفضل تركن فيه مكان عنده قعده زي كافيه او كده وانزل من العربيه انت واسرتك ، بلاش تقعد فيها عشان لو لاقدر الله حصل اي تصادم تكون برا العربيه ولو لزم الجلوس فيها يبقى تربطو كلكم حزام الأمان وتبعدو عن حواف الطريق قدر الإمكان .

نصائح ومعلومات للقيادة فى الشبورة
– [ ] ركززززز ، القياده في الشبوره محتاجه تركيز قدامك وجنبك ووراك فياريت تطفي اي حاجه تشتت تركيزك زي الراديو او الأغاني … الكلام والرغي ..

– [ ] خليك في حارتك ابوس ايدك بلاش تعدي او تغير الحارات ولا تاخد غرز ، ركز انك تمشي بين الخطين .

– [ ] يفضل انك تفتح الشباك حته صغيره عشان تسمع التنبيهات اللي حواليك وفي نفس الوقت تمنع تكثيف البخار داخل السياره .

– [ ] شغل سخانات الزجاج الخلفيه والامامية ان وجد عشان تزيل بخار المياه من الزجاج وبالتالي تشوف كويس ولو مفيش يبقى بفوطه او منديل واركن وامسح الزجاج كويس .

– [ ] خلي مساحاتك شغاله وبحاله جيده عشان تستخدمها في تنضيف الزجاج .

– [ ] النور الأصفر هو رقم واحد في اختراق الضباب فلو عربيتك نورها أبيض سواء نازله بيه او مركبه فده مش هايكون أحسن حاجه في وقت الضباب عشان اللون الأبيض بيعكس حبات المياه وبالتالي مش هاتشوف كويس في الشبورة منه.

— متشغلش الفلاش اشارات لانها بتشوش على اللي خلفك وقت الدوران لليمين او اليسار

–انتبه للخط الابيض في الطريق وامشي عليه

وفي الآخر هاقولك انك لو تقدر ماتنزلش من بيتكم وتلغي اي معاد يكون افضل ، وصدقني اي تأخير في الدنيا أهون من ضرر يحصل ليك او لأسرتك او ممتلكاتك وعلى فكره مش شرط انك تكون السبب في الضرر ده ممكن يكون غيرك هو اللي يضرّك عشان كده ننصح انك تتجنب النزول في أوقات الضباب من الأساس وربنا يسلم طريقنا جميعا

موديلات متعددة .. اختر الأفضل والأنسب
انت اختار .. واحنا علينا الباقى وموجود شحن وتوصيل سريع
كلمنا على الواتس واترك رسالتك وسنقوم بالرد عليها فى اسرع وقت https://wa.me/+201272727800